Tikinti
Naxçıvan Muxtar Respublikasında son dövrlərdə tikinti quraşdırma işlərinin həcmi dinamik artımla müşahidə olunur. Zəngin və çoxsaylı tikinti materiallarına malik muxtar respublikanın ərazisi burada tikinti materialları, dəmir-beton, kərpic, travertin, mərmər və s. sənaye müəssisələrinin yaradılmasına və nadir tikinti məhsullarının dünya bazarına çıxarılmasına imkan vermişdir.
Naxçıvan Muxtar Respublikasının hər bir sakinin normal yaşayışı üçün kommunal xidmətlərin səviyyəsinin yüksəldilməsi, zəruri infrastruktur layihələrinin gerçəkləşdirilməsi, ilk növbədə əhalinin və iqtisadiyyatın bütün sahələrinin fasiləsiz olaraq elektrik enerjisi, təbii qaz ilə təminatı, yolların bərpası və yenidən çəkilməsi, zəruri abadlıq işlərinin aparılması, yeni istehsal sahələrinin yaradılması istiqamətində işlər muxtar respublikada uğurla aparılmaqdadır. Ümumi inkişafın təmin edilməsində vəsait qoyuluşları mühüm rol oynayır.
Bu sahədə diqqəti cəlb edən digər mühüm xüsusiyyət isə ondan ibarətdir ki, müasir texniki avadanlıqlarla təchiz olunmuş istehsal müəssisələrinin, təhsil, elm, səhiyyə, mədəniyyət ocaqlarının, inzibati obyektlərin, infrastruktur sahələrinin tikintisi sadəcə muxtar respublikanın mərkəzini deyil, onun bütün rayon mərkəzini və kəndlərini də əhatə etmişdir.
Ümumi inkişafın təmin edilməsində vəsait qoyuluşları mühüm rol oynayır. 2022-ci ilin yanvar-sentyabr aylarında muxtar respublikada 175 müxtəlif təyinatlı obyekt tikilmiş, yenidən qurulmuş və ya əsaslı təmir olunmuş, 213 müxtəlif təyinatlı obyektin tikintisi, yenidən qurulması və ya əsaslı təmiri davam etdirilmişdir.
Yaşayış məntəqələrinin abadlaşdırılması, səmərəli idarəetmənin və əhaliyə göstərilən xidmətlərin səviyyəsinin yüksəldilməsi tədbirlərinə uyğun olaraq 2022-ci ilin doqquz ayında 7 kənd mərkəzinin tikintisi, 1 kənd mərkəzinin yenidən qurulması davam etdirilmişdir. Bundan əlavə, Şərur şəhər inzibati ərazi dairəsi üzrə nümayəndəliyinin inzibati binasının yenidən qurulması başa çatdırılmış, Culfa Rayon İcra Hakimiyyətinin inzibati binasının tikintisi davam etdirilir.
Muxtar respublikada kommunal xidmətlərin səviyyəsinin daha da yaxşılaşdırılması məqsədilə bələdiyyələrə 13 traktor və qoşqusu verilmişdir.
Muxtar respublikada 3 yaşayış binasının yenidən qurulması başa çatdırılmış, 3 yaşayış binasının tikintisi, 11 yaşayış binasının yenidən qurulması davam etdirilir. Bundan əlavə, Uzunoba Su Anbarı ətrafında Bağ Evləri yaşayış-istirahət məntəqəsinin tikintisi başa çatdırılmış, Naxçıvan şəhərində “Gənclər Yaşayış Kompleksi”nin tikintisi davam etdirilmişdir.
Əhalinin həyat səviyyəsinin yaxşılaşması fərdi yaşayış evlərinin tikintisinə də müsbət təsir göstərmiş, 2022-ci ilin yanvar-sentyabr aylarında muxtar respublikada əhalinin şəxsi vəsaiti hesabına, ümumilikdə, 364 min 717 kvadratmetr yaşayış sahəsi istifadəyə verilmişdir ki, bu da bir il öncəki göstəricidən çoxdur.
Babək, Kəngərli və Sədərək rayon mərkəzlərində, ətraf qəsəbə və kəndlərdə içməli su təchizatı və kanalizasiya sistemlərinin, Culfa rayonunun Yaycı, Kəngərli rayonunun Qarabağlar, Xok, Yurdçu və Qabıllı, Sədərək rayonunun Dəmirçi kəndlərində içməli su şəbəkələrinin tikintisi davam etdirilir.
Babək rayonunun Sirab kəndində və Uzunoba Su Anbarı yaxınlığında içməli su xətlərinin çəkilişi başa çatdırılmış, Cəhri qəsəbəsinə və Vayxır kəndinə içməli su xətlərinin çəkilişi davam etdirilir.
Şərur rayonunun Alışar, Babək rayonunun Qahab, Kəngərli rayonunun Qabıllı kəndlərində və Qıvraq qəsəbəsində hər birində bir subartezian quyusunun tikintisi başa çatdırılmışdır.